शिरोळ प्रतिनिधी : लगाम न्यूज नेटवर्क
शिरोळ तालुक्याचे आमदार राजेंद्र पाटील यड्रावकर यांनी चालविण्यास घेतलेला घोडावत जागरी कारखाना मागील हंगामाचा दुसरा हप्ता न देताच, तसेच याबाबत एक महिना अगोदर निवेदन देऊनही संघटनांशी कसलीही चर्चा न करता, भागातील इतर कारखान्यांच्या आधी स्वतःचं चालू केला आहे. या विरोधात आज आंदोलन अंकुश संघटनेने त्या कारखान्याचे गेट बंद करून दारातच आंदोलन चालू केले होते. सकाळी अकरा वाजलेपासून बसलेल्या आंदोलकांना संध्याकाळी साडेसहा वाजता जयसिंगपूर पोलिसांनी अटक केली व आंदोलकांच्यावर गुन्हा दाखल केला आहे.
यावर आंदोलकांनी "आमच्यावर गुन्हा घालताय तर घाला.. पण आमची देखील कारखान्याच्या विरोधात फिर्याद घ्या" असा पोलिसांच्या मागे तगादा लावला. परंतु यावर जयसिंगपूर पोलीस कसलीही दखल घेण्यास तयार नाहीत म्हणून आंदोलन अंकुशच्या चिवट कार्यकर्त्यांनी जयसिंगपूर पोलीस स्टेशन मध्येच उपोषण चालू केले आहे.
जयसिंगपूर पोलीस स्टेशनचे पोलीस निरीक्षक सत्यवान हाके साहेब रजेवर असल्यामुळे, शिरोळ पोलीस स्टेशनचे पोलीस निरीक्षक प्रवीण खानापुरे यांच्याकडे जयसिंगपूर पोलीस स्टेशनचा प्रभार दिलेला आहे. परंतु कर्तव्यदक्ष पोलीस निरीक्षक खानापुरे आंदोलक उपोषणाला बसून देखील पोलीस स्टेशन कडे रात्री नऊ वाजून 20 मिनिट पर्यंत तरी फिरकायला तयार नाहीत. आमच्या प्रतिनिधीने त्यांच्याशी संपर्क केला असता, "मी शिरोळमध्ये महत्त्वाच्या कामात आहे. नंतर येतो असे उत्तर मिळाले."
टिप्पणी पोस्ट करा