जिल्हाधिकाऱ्यांनी तात्काळ कारवाई करावी - कृष्णा देशमुख
शिरोळ प्रतिनिधी : लगाम न्यूज नेटवर्क
शिरोळ तालुक्यातील प्रमुख शासकीय कार्यालय असलेल्या तहसीलदार कार्यालय येथे शुक्रवार दिनांक 24 ऑक्टोबर रोजी जवळपास 70 ते 80 टक्के अधिकारी व कर्मचारी सुट्टीवर होते. सलग 6 दिवस सुट्टी मिळून देखील शासकीय कर्मचाऱ्यांची सुट्टी अजून संपता संपेना. आज देखील अधिकारी कर्मचारी रजेवर गेल्याने नागरिकांची कामे खोळंबळी आहेत. अगोदरच मागील शनिवार रविवार व दिवाळीची चार दिवस सुट्टी यामध्ये तालुक्यातील नागरिकांची कामे पेंडिंग पडली असून, अशातच शुक्रवारी आपली कामे होतील या आशेने आलेले कित्येक नागरिक तहसील कार्यालय येथे अधिकारी च नसलेने हेलपाटे मारून परत गेले. अगोदरच शासनाने शासकीय अधिकाऱ्यांच्या आठवड्यातील कामाचे पाचच दिवस केले आहेत. त्यामध्ये शनिवार व रविवार सुट्टी धरून वर्षातून जवळपास 120 सुट्ट्या असतात आणि कामाची वेळ सकाळी पावणेदहा ते सायंकाळी सव्वा सहा केली असताना, कित्येक सरकारी अधिकारी वेळेत हजर नसतात. हा बऱ्याच जणांचा अनुभव आहे.
आज आंदोलन अंकुश संघटनेचे कृष्णा देशमुख यांनी तहसीलदार कार्यालयात अचानक धाड मारून या सगळ्या गोष्टीची पोल खोल केली.
आपल्या शासनाने लोकांचे हेलपाटे वाचावेत, यासाठी सर्व सेवा सुविधा ऑनलाईन केल्या. पण विनाकारण लोकांना सर्वर डाऊन आहे, वरूनच प्रॉब्लेम आहे. असे विविध कारणे सांगून कामे लवकर केली जात नाहीत. अशा विविध कारणांनी लोकांचे हेलपाटे तर होतातच, पण शुक्रवार दिनांक 24 ऑक्टोबर रोजी शिरोळ तहसील कार्यालय चालू असून देखील अधिकारी नसल्याने सरकारी सुट्टी असल्यासारखे वाटत होते. त्यामुळे जनतेची कामे करणार कोण..? असा सवाल सामाजिक कार्यकर्ते कृष्णा देशमुख यांनी तहसीलदार व जिल्हाधिकारी यांच्यासमोर उपस्थित केला आहे.
टिप्पणी पोस्ट करा