शिरोळ प्रतिनिधी : लगाम न्यूज नेटवर्क
चालू गळीत हंगामातील पहिला हप्ता 3751 रुपये व मागील 200 रुपये दिल्याशिवाय राजकीय चर्चा केली जाणार नाही. अशी माहिती स्वाभिमानी शेतकरी संघटनेचे युवा जिल्हा अध्यक्ष,पंचायत समितीचे मा.उपसभापती श्री.सचिन शिंदे यांनी पत्रकारांशी बोलताना दिली आहे.
काँग्रेस पक्षाचे ज्येष्ठ नेते आ.सतेज उर्फ बंटी पाटील यांनी काल 28 ऑक्टोबर रोजी शिरोळ येथे महाविकास आघाडी च्या वतीने जयसिंगपूर, शिरोळ या दोन नगरपालिका व जिल्हा परिषद, पंचायत समितीच्या निवडणुका समविचारी पक्षाच्या कार्यकर्त्यांच्या समवेत लढविणार असल्याची घोषणा केली होती. यावेळी स्वाभिमानी शेतकरी संघटनेचे नेते माजी खासदार राजू शेट्टी, हे देखील या महाविकास आघाडीत सहभागी असल्याचे त्यांनी सांगितले होते.
या पार्श्वभूमीवर सचिन शिंदे म्हणाले की, स्वाभिमानी शेतकरी संघटना ही चळवळीतून उभे राहिलेली संघटना आहे. शेतकऱ्याच्या हितासाठी स्थापन झालेली ही संघटना असून, कधीही संघटनेने चळवळीचा उपयोग राजकारणासाठी केलेला नाही. सध्या ऊस दराचे आंदोलन सुरू असताना माजी मंत्री बंटी पाटील यांनी केलेले विधान संयुक्तीक नाही. यामुळे शेतकऱ्यांच्या मध्ये संभ्रम निर्माण होण्याची शक्यता आहे. त्यांचा आम्ही आदर करतो. सध्या ऊस दराचे आंदोलन सुरू असताना राजकारणाबद्दल चर्चा करणे योग्य नाही. आ.बंटी पाटील, ना.हसन मुश्रीफ, पालकमंत्री प्रकाश आबिटकर या नेत्यांनी या कामी लक्ष घालून, ऊस दराचा समन्वयने मार्ग काढावा. त्याचबरोबर आंदोलक व कारखानदारांच्यात संघर्ष होऊ नये. याची दक्षता घ्यावी. अशी विनंती करून, त्यांनी ऊस दराचा प्रश्न मिटल्यानंतर चर्चा करणार असल्याचे शेवटी बोलताना सांगितले.
टिप्पणी पोस्ट करा