शिरोळ प्रतिनिधी : लगाम न्यूज नेटवर्क
उसाला जादा दर मिळवून देणाऱ्या "खुद तोड खुद वाहतूक" या क्रांतिकारी प्रयोगाची सुरुवात या हंगामात शिरोळ मध्ये होत आहे. यामुळे कारखाण्याच्या जवळ असणाऱ्या शेतकऱ्यांना ऊस दरात मोठा फायदा मिळणार असून, खुद तोड खुद वाहतूक या प्रयोगामुळे दत्त साखर कारखाण्याच्या 10 किलोमीटर च्या परिघात असणाऱ्या, ऊस उत्पादकांचा वेळेत ऊस तुटणार आहे.
आंदोलन अंकुश संघटनेचे प्रमुख धनाजी चुडमुंगे यांच्या कल्पनेतील शेतकरी वजन काट्यानंतर चा हा दुसरा प्रयोग या भागात शेतकऱ्यांना फायदा करून देणारा ठरणार आहे. या खुद तोड खुद वाहतूक प्रयोगात शेतकऱ्यांनी स्वतः ऊस तोडायचा, संघटना या शुगर केन लोडर ने तो ऊस वाहनात भरणार आणि संघटनेचे वाहतूकदार वाहतूक करून तो ऊस कारखान्यापर्यंत पोहोचवणार. असा हा प्रयोग आहे. या प्रयोगात भाग घेणाऱ्या शेतकऱ्यांना या हंगामात उसाला जवळपास 3900 रुपये टणाला दर मिळणार आहे.
शिरोळ व आसपास च्या भागातील ऊस वेळेत तुटत नव्हता आणि लांबून आणलेल्या उसाची वाहतूक या कारखाण्याच्या जवळ असणाऱ्या शेतकऱ्यांना द्यावी लागत होती. या प्रयोगा मुळे या दोन्ही अडचणी सोडवण्याच्या हेतूने या प्रयोगाची रचना केली असल्याचे धनाजी चुडमुंगे यांनी सांगितले आहे. ऊस उत्पादक शेतकऱ्यांच्या जीवनात क्रांती घडवणाऱ्या या प्रयोगाला शेतकऱ्यांची ही साथ मिळणार असून, मजूर टंचाईवर हा प्रयोग उत्तर ठरणार आहे.
शुगर केन लोडर ने शेतकऱ्यांनी तोडून टाकलेला ऊस वाहनात भरला जाणार आहे. हा लोडर कोईमतूर येथील प्रथितयश अश्या बुल कंपनी कडून तयार करून घेतला आहे. तो लोडर शिरोळ मध्ये दाखल झाला असून, आज ट्रॅक्टर वर फिट करण्यात आला आहे. हा लोडर दिवसात 100 टन ऊस भरण्याची त्याची क्षमता असल्याचे धनाजी चुडमुंगे यांनी यावेळी सांगितले.
टिप्पणी पोस्ट करा