शिरोळ प्रतिनिधी : लगाम न्यूज नेटवर्क
दत्त साखर शिरोळ सह परिसरातील कारखान्यांनी काल 30 ऑक्टोबर रोजी एक रक्कमी 3400 रुपये दर जाहीर केला आहे. याबाबत हा दर मान्य नसले बाबत आंदोलन अंकुश संघटनेने ऊस आंदोलनाचा शड्डू ठोकला आहे, त्याचबरोबर शेतकर्‍यांना परवडणारा दर मिळेपर्यंत तोडी न घेण्याचे आवाहनदेखील केलेले आहे. या आंदोलन अंकुश संघटनेच्या आवाहनाला शेतकर्‍यांचा चांगलाच प्रतिसाद मिळताना दिसत असून, दत्त सह इतर कारखान्याच्या तोडी शेतकरी नाकारताना दिसत आहेत. तुरळक ठिकाणी सुरू असलेल्या तोडी शेतकर्‍यांनी रोखल्या आहेत.
शेडशाळ ता.शिरोळ मधील शेतकर्‍यांनी तर तंबू ठोकूनच तोडी रोखायला व ऊस वाहतूक करणारी वाहने अडवून परत पाठवायला सुरवात केली आहे. याबाबत धनाजी चुडमुंगे यांच्यासोबत बोललो असता, कारखान्याच्या दहा वर्षांमध्ये 2015 - 16 ला 3100 रुपये दर घेतलेला होता आणि आजही आपण तोच दर घेत आहोत. केंद्र सरकार म्हणते की, 1400 रुपयांची वाढ एफ.आर.पी. मध्ये केली. तर मग आज तीच उसाची एफ.आर.पी. 4200 रुपये होणे गरजेचे होतं. पण आज आपल्याला कारखान्यांनी आपला सगळा हात हाणून चोरलेली एफ.आर.पी. दिली जाते. दरवर्षी रिकव्हरीचा टक्का हाणला जातो आणि 400 रुपये च्या जवळपास खिशात घातले जातात. तोडणी वाहतुकीमध्ये 200 -250 रुपये सरासरीने अवाजवी खर्च टाकून वाढवली जाते.
साखर बग्यास मळी यांचे ताळेबंदातील दर वेगळे आणि बाजारातले दर वेगळे यामध्ये घोळ घालून 200 -400 रुपये हाणले जात आहेत. असे यांच्या सगळ्या हाणामाऱ्या करून राहिलेली तुटपुंजी एफ.आर.पी. आज कारखानदार आपल्या तोंडावर हे फेकायला लागलेत आहेत.
आम्ही मागील गळीत हंगामाचा हिशोब करून 200 रुपये आणि चालू हंगामाला 4000 रुपये मागणी केलेली आहे, या मागणीचा विचार जोपर्यंत होत नाही, तोपर्यंत आपण कोणत्याही परिस्थितीमध्ये ऊसाला तोड घेऊ नका. थोडा धीर धरा आणि कोण ऊस तोडत असेल तर त्याला तोड घेऊ नको असे समजावून सांगा असे आवाहन शेतकर्‍यांना केले आहे.
टिप्पणी पोस्ट करा