बायकॉट जिओ : महादेवी हत्तीणीसाठी औरवाड येथील आचार्य श्री. विद्यासागरजी महाराज चौकामध्ये ग्रामस्थांनी नाकारली जिओ ची सेवा...

विशेष प्रतिनिधी : प्रा.चिदानंद अळोळी

कोल्हापूर जिल्ह्यातील नांदणी मठामधील प्रसिद्ध महादेवी हत्तीण न्यायालयीन आदेशानुसार गुजरातमधील अंबानी यांच्या वनतारा हत्ती केंद्रात रवाना करण्यात आली. मात्र ती हत्तीण जाताच नांदणी गाव आणि या मठाशी भावनिक नातं असलेल्या तब्बल ७४३ गावांमध्ये संतापाची तीव्र लाट उसळली आहे. ही घटना धार्मिक, सांस्कृतिक आणि सामाजिक पातळीवर मोठा धक्का ठरल्याने ग्रामस्थांनी ‘Jio Ban’ म्हणजेच रिलायन्स जिओ नेटवर्कवर बहिष्कार घालण्याचा आणि सिम कार्ड दुसऱ्या कंपन्यांकडे पोर्ट करण्याचा निर्धार केला आहे.

आता संपूर्ण महाराष्ट्रभर ही मोहीम राबवली जात आहे. या अंतर्गत नांदणी सह परिसरातील हजारो जिओचे ग्राहक आपलं सिमकार्ड अन्य कंपन्यांमध्ये पोर्ट करून घेत आहेत.  अवघ्या काही दिवसात हजारो ग्राहकांनी आपलं जिओ सिम कार्ड पोर्ट करून घेतल्यानंतर, शुक्रवार 1 ऑगस्ट पासून जिओ कार्ड पोर्ट करून घेण्यासाठी औरवाड च्या आचार्यश्री चौकात ग्रामस्थांची गर्दी पाहायला मिळू लागली आहे. 

गावागावातून मुक मोर्चा व निषेधाचे ठराव.. 

महादेवी हत्तीण गुजरातला नेण्याच्या विरोधात पंचक्रोशीतील विविध गावांमध्ये मुक मोर्चा काढला जात आहे. तसेच अनेक ग्रामपंचायतींनी ठराव करुन निषेधही नोंदवण्यास सुरुवात केली आहे. तसेच आज रविवार दिनांक 3 मार्च रोजी माजी खासदार राजू शेट्टी यांच्या नेतृत्वखाली नांदणी ते जिल्हाधिकारी कार्यालय, कोल्हापूर पर्यंत 45 किलोमीटर चा मोर्चा काढण्यात आला आहे.