शिरोळ प्रतिनिधी :
शिरोळ ग्रामपंचायतीची 2018 साली नगरपरिषद झाली. शासनाकडून मोठ्या प्रमाणात निधी आला. सगळीकडे रस्ते, गटारी, लाईटच्या सुविधा झाल्या.
परंतू याच शिरोळ नगर परिषदेच्या हद्दीतील आगर रोडवरील चुडमुंगे मळा व त्या परिसरातील लोकांना आज तागायत रस्ता झाला नाही. सदर चुडमुंगे मळा व परिसरात 300 ते 400 लोक राहत असून, या भागातील लोकांना 1 किलोमीटर गाडी लांब लावून, रस्ता काढत चालत जावे लागत आहे. चालत जरी जायचे म्हटले तरी, गुडघाभर चिखलातून चालत जावे लागत आहे. लहान मुलांना शाळेला जाण्यासाठी अडचण निर्माण झाली आहे. वयोवृद्ध लोकांना तरी या वाटेवरून जाणेच शक्य राहिले नाही. आजारी व्यक्तीला तात्काळ दवाखान्यात न्ह्यायची वेळ जर आलीच, न्ह्यायचे कुठून असा प्रश्न येथील नागरिकांना पडला आहे.
2019 व 2021 साली या भागात महापूराचे पाणी आलेले होते, जर यावर्षी देखील तशी परिस्थिती ओढवली तर आम्ही बाहेर पडायचे कसे...? काय आम्ही महापुरात बुडून मरायचे...? असा सवाल येथील नागरिक करत आहेत.
नागरिकांना मूलभूत सोयी सुविधा पुरविणे ही ज्यांची जबाबदारी आहे ते प्रशासन व आपल्या सर्वांचा आवाज म्हणून आपण ज्यांना निवडून देतो ते लोकप्रतिनिधी यांना या गंभीर विषयावर लक्ष देऊन रस्ता करून देण्याची आज तागायात गरज वाटली नाही.
महाराष्ट्र जमीन महसूल अधिनियम, १९६६ च्या कलम १४३ नुसार, शेतकऱ्यांना, नागरिकांना स्वतःसाठी रस्ता उपलब्ध करून घेण्याचा अधिकार आहे. त्याप्रमाणे तहसीलदार, शिरोळ यांनी आम्हाला लवकरात लवकर रस्ता उपलब्ध करून द्यावा, अशी मागणी येथील नागरिक करीत आहेत.
टिप्पणी पोस्ट करा