शिरोळ प्रतिनिधी :
शिरोळ तालुक्यातील लिंगायत समाजाच्या वतीने सरसकट लिंगायत समाजाला महात्मा बसवेश्वर आर्थिक विकास महामंडळाचा लाभ मिळालाच पाहिजे. या मागणीसाठी आज सोमवार दिनांक 21 जुलै 2025 रोजी सकाळी अकरा वाजता तहसीलदार शिरोळ यांना निवेदन देण्यात आले. निवेदनात म्हटले आहे की,
दिनांक 9 ऑगस्ट 2023 रोजी महाराष्ट्र सरकारने जगतज्योती महात्मा बसवेश्वर आर्थिक विकास महामंडळाची स्थापना केलेली आहे. या महामंडळाची स्थापना करताना, यामध्ये सरकारने फक्त ओबीसी दाखला असलेल्या लिंगायत समाज बांधवांना याचा लाभ मिळावा. अशी अट घालून 80 टक्के पेक्षा जास्त खुल्या प्रवर्गावर अन्याय केलेला आहे.
महाराष्ट्रात खुल्या प्रवर्गातील लिंगायत समाजाची संख्या जास्त असून, सरसकट लिंगायत समाजाची उन्नती झाली पाहिजे. हा हेतू असताना उर्वरित समाजाला वंचित ठेवण्याचे कारण काय..? आज लिंगायत समाजातील खुल्या प्रवर्गातील विद्यार्थ्यांना उद्योग व्यवसाय करण्यासाठी, त्याचबरोबर समाजात महिला भगिनींची दयनीय अवस्था झाली असून, आर्थिक मागास असल्याकारणाने उच्चशिक्षिणासाठी अडचणी येत आहेत. एखादा व्यवसाय करावयाचा असेल तर, त्यासाठी लागणारे भांडवल नसल्यामुळे लिंगायत युवक मागे राहत आहे.
लिंगायत गरीब गरजू महिलांना गृह उद्योग करण्यासाठी, छोटा व्यवसाय करण्यासाठी आर्थिक मदतीची गरज आहे. त्यामुळेच जगतज्योती महात्मा बसवेश्वर आर्थिक विकास महामंडळाचा लाभ सरसकट लिंगायत समाजाला मिळालाच पाहिजे. ओबीसीची अट काढून सरसकट लिंगायत समाजाला लाभ द्यावे, असा सुधारित अध्यादेश तात्काळ काढून जगतज्योती महात्मा बसवेश्वर आर्थिक विकास महामंडळाला स्वायत्त दर्जा देण्यात यावा.
यावेळी स्वप्नील चौगुले, मनोज रणदिवे सर, शंकर बिराजदार, सुरेश पाटील, राजेंद्र चौगुले, प्रशांत अपिने, डॉ. जे. बी. पाटील, संजय शहापूरे, रमेश मिठारे व ईतर लिंगायत समाजातील बांधव मोठ्या संख्येने उपस्थित होते.
टिप्पणी पोस्ट करा