शिरोळ प्रतिनिधी : लगाम न्यूज नेटवर्क
पावसाळ्यात रोगराई चे प्रमाण झपाट्याने वाढत असते. पावसाळ्यामध्ये, अनेक प्रकारचे रोग आणि संसर्ग पसरण्याची शक्यता जास्त असते. याचे मुख्य कारण म्हणजे वातावरणातील बदल, वाढलेली आर्द्रता आणि साचलेले पाणी.
अश्यातच शिरोळ नगरपरिषदेच्या आरोग्य ठेकेदाराकडील सर्व कर्मचारी गेल्या ८ दिवसांपासून संपावर गेले आहेत. त्यामुळे शिरोळ शहरातील गटारी तुंबलेल्या अवस्थेत आहेत, कचरा उठाव होत नाही तसेच रोगराई पसरू नये, म्हणून केली जाणारी फवारणी केली जात नाही. त्यामुळे शिरोळ शहरातील नागरिकांचे आरोग्य धोक्यात आले आहे. शहरात रोगराई पसरण्याची दाट शक्यता आहे.
यासंदर्भात ठेकेदारच्या कर्मचार्‍यांशी विचारणा केली असता, धक्कादायक बाब समोर आली की, ठेकेदाराने कर्मचार्‍यांचा गेल्या ३ महिन्यात पगार दिलेला नाही. तसेच गेल्या ४ वर्षात पीएफ भरलेला नाही. त्यांना मेडिक्लेम च्या सुविधा मिळत नाहीत. त्यामुळे कर्मचार्‍यांचे म्हणणे आहे की, आम्ही आमचे घर चालवायचे कसे...?
शिरोळ नगरपरिषदेचा आरोग्याचा ठेका दरवर्षी कोट्यावधी रुपयांना दिला जातो. ठेका देत असताना ठरवून दिलेली नियमावली ठेकेदाराकडून कधीच पाळली जात नाही. वेळेवर आरोग्याच्या कोणत्याच सुविधा पुरवल्या जात नाहीत. त्यामुळे या सगळ्यावर नियंत्रण ठेवण्याची ज्यांची जबाबदारी आहे, त्या बलाढ्य पगार घेत बसलेल्या नगरपरिषदेतील अधिकार्‍यांनी शहराच्या आरोग्याची सर्वस्वी जबाबदारी घेऊन, स्वतः फवारणी करावी, गटारी काढाव्या व घंटा गाडी फिरवावी. अशी मागणी नागरिकातून होत आहे.
टिप्पणी पोस्ट करा