आंदोलन अंकुश च्या नेतृत्वात जयसिंगपूर महावितरण वर धडक...
जयसिंगपूर प्रतिनिधी :
कवठेसार, ता. शिरोळ गावात अदानी कंपनीच्या लोकांनी ग्राहकांना न विचारता आणि त्यांची संमती न घेताच घरात कोणी नाही, हे पाहून स्मार्ट मीटर बसवली होती. त्याची दुप्पट विज बिले या महिन्यात आल्याने, ग्रामस्थांनी थेट महावितरण च्या जयसिंगपूर कार्यालयात धडक देऊन तात्काळ ही स्मार्ट मीटर बदला, अन्यथा या मिटरचे बिल आम्ही कोणच भरणार नाही. अशी मागणी त्यांनी कार्यकारी अभियंता श्री.आडके यांच्या कडे केली.
आंदोलन अंकुश चे प्रमुख धनाजी चुडमुंगे व दानोळीतील आंदोलन अंकुश चे प्रमुख दत्तात्रय जगदाळे यांच्या नेतृत्वात आज त्रासलेले कवठेसार मधील ग्रामस्थ विज बिले दुप्पट आल्याने आक्रमक झाले होते. आमची जुनी मीटर तात्काळ बसवा, आमचा ग्रामीण भाग आहे, आम्हाला ऑनलाईन भरायला कसे जमणार...? उद्या प्रिपेड मीटर केल्यावर आम्ही पैसे कसे भरायचे...? आम्ही शेतात गेल्यावर तुम्ही घरात कसे आला...? त्यांच्या बरोबर वायरमन का नव्हता...? असे एक ना अनेक प्रश्न अभियंता आडके यांना विचारले आणि दोन दिवसात ही मीटर काढा नाहीतर सगळे गाव तुमचे बिल भरणार नाही. असा इशाराच त्यांनी दिला.
बेकायदेशीर रित्या घरात घुसून आणि ग्राहकांच्या परवानगी शिवाय स्मार्ट मीटर बसवणार नाही. म्हणून तुम्ही आम्हाला गेल्या महिन्यात आश्वासन दिले होते. त्याचा विसर पडला काय अशी विचारणा धनाजी चुडमुंगे यांनी करून, पुन्हा हे स्मार्ट मीटर बसवण्याचा प्रकार घडल्यास किंवा सक्ती केल्यास महावितरण कार्यालयावर मोर्चा काढू. असा इशारा धनाजी चुडमुंगे यांनी शेवटी दिला.
यावेळी बसगोंडा पाटील, शिवलिंग जंगम, तुकाराम पाटील, सिदगोंडा पाटील, भूपाल जंगम, महालिंग पाटील व कवठेसार मधील विज ग्राहक उपस्थित होते.
टिप्पणी पोस्ट करा