विशेष प्रतिनिधी : प्रा.अमोल गावडे
महाराष्ट्र राज्य माध्यमिक व उच्च माध्यमिक शिक्षण मंडळातर्फे घेण्यात येणारी उच्च माध्यमिक प्रमाणपत्र (इ. 12 वी ) परीक्षा दि. 11/02/2025 ते दि. 18/03/2025 व माध्यमिक शालांत प्रमाणपत्र (इ. 10 वी) परीक्षा दि. 21/02/2025 ते 17/03/2025 या कालावधीत पुणे, नागपूर, छत्रपती संभाजीनगर, मुंबई, कोल्हापूर, अमरावती नाशिक,लातूर व कोकण या विभागीय मंडळांमार्फत आयोजित करण्यात आलेल्या आहेत.
सदर दोन्ही परीक्षांना राज्यातून सुमारे 31 लाख विद्यार्थी प्रविष्ट होणार आहेत.
बोर्डाने परीक्षा केंद्रावरील पर्यवेक्षक आणि केंद्र संचालकांची आदलाबदल करण्याचा निर्णय मागे घेतला आहे.:
महाराष्ट्र राज्य माध्यमिक व उच्च माध्यमिक शिक्षण मंडळाने अलीकडेच दहावी आणि बारावीच्या परीक्षेसंदर्भात मोठा निर्णय घेतला होता. या परीक्षा कॉपीमुक्त पार पडाव्यात यासाठी बोर्डाने परीक्षा केंद्रावरील पर्यवेक्षक आणि केंद्र संचालकांची आदलाबदल करण्याचा निर्णय घेतला होता. मात्र आता हा निर्णय मागे घेण्यात आलाय. कॉपी आढळल्यास आता केंद्राची मान्यता कायमची रद्द करण्यात येणार आहे.
इयत्ता दहावी-बारावीची परीक्षा कॉपीमुक्त पार पडावी, म्हणून पर्यवेक्षक व केंद्र संचालकांची आदलाबदल करण्याचा निर्णय मुख्यमंत्र्यांच्या 100 कलमी कार्यक्रमाअंतर्गत घेण्यात आला होता. पण, शिक्षक संघटनांसह शिक्षक आमदारांच्या विरोधामुळे महाराष्ट्र राज्य माध्यमिक व उच्च माध्यमिक शिक्षण मंडळाने तो निर्णय बदलला आहे. आता कोरोना काळ वगळून 2018, 2019, 2020 व 2023 आणि 2024 या काळातील परीक्षेवेळी ज्या केंद्रांवर गैरप्रकाराची प्रकरणे आढळली, त्या केंद्रांवरील पर्यवेक्षक व केंद्र संचालक मात्र बदलण्याचा निर्णय बोर्डाने घेतला आहे.
टिप्पणी पोस्ट करा