येथील सौ.वि.ख.माने कन्या माध्यमिक विद्यालयात जिल्हा पोलीस मित्र फाउंडेशनच्यावतीने खेळाचे साहित्य वाटप करताना मान्यवर
कुरुंदवाड प्रतिनिधी : नंदकुमार सुतार सर
समाजातील गुलामगिरी नष्ट करण्यासाठी शिक्षणाशिवाय दुसरा कोणताही मार्ग नाही. समाजाच्या उद्धाराकरिता स्त्री शिक्षणाचा पाया घालण्यामागे महात्मा फुले यांचा दूरगामी विचार होता. समाजात परिवर्तन करायचा असेल तर शिक्षण हे सर्व सुधारणांचे मूळ आहे. म्हणूनच त्यांनी स्त्रियांना शिक्षणाची कवाडे खुली करण्याचे क्रांतिकारक पाऊल उचलले होते. असे प्रतिपादन जिल्ह्याचे पोलीस मित्र फाउंडेशनचे अध्यक्ष, अशोक राजपुरोहित यांनी केले.
येथील सौ. विमलादेवी खंडेराव माने (रहिमतपूरकर) कन्या माध्यमिक विद्यालयात पोलीस मित्र फाउंडेशनच्या वतीने विद्यार्थिनींना खेळाचे साहित्य वाटप करण्यात आले त्याप्रसंगी आयोजित कार्यक्रमात ते बोलत होते. प्रमुख उपस्थिती म्हणून फाउंडेशनचे उपाध्यक्ष, आनंद मोकोटे व शहर संघटक मुमताज बैरागदार होते.
ते पुढे म्हणाले की, महात्मा फुले, राजर्षी शाहू महाराज, डॉ. बाबासाहेब आंबेडकर, कर्मवीर भाऊराव पाटील यांच्यासारख्या समाज क्रांतिकारकांच्या अतुल्य योगदानामुळे शिक्षणाची संधी मिळाली आहे. त्यांच्या त्यागाला न विसरता बलशाली राष्ट्राच्या उभारणी करीता विद्यार्थिनींनी प्रयत्नशील राहिले पाहिजे. ज्या वेगाने जगातील विविध क्षेत्रात बदल घडत आहेत, त्या वेगाने शिक्षण क्षेत्रात बदल घडण्याची गरज अधोरेखित होत आहे. शिक्षण क्षेत्रात निर्माण झालेली स्पर्धा केवळ आपल्या पुरती मर्यादित राहिलेली नाही. कधीकधी शिक्षण क्षेत्रात फारशी स्पर्धा नव्हती.केवळ शिक्षण हाच विचार त्यात समाविष्ट होता.जगभरातील शिक्षणाचा विचार करताना त्यातून जगातील समस्या निराकरण करण्याची क्षमता प्राप्त व्हावी. विविध आव्हाने पेलण्याची हिंमत सहजतेने प्राप्त व्हावी. शिक्षणातून तो सामाजिक नागरिक होण्याचे अपेक्षा आहे.यामुळे भविष्यवेधी शिक्षणाच्या दृष्टिकोनाने विचार केला जाऊ लागला आहे. त्या संदर्भात विद्यार्थ्यांमध्ये काही क्षमता रुजवण्याची आज काळाची गरज आहे.
प्रारंभी स्वागत व प्रास्ताविक मुख्याध्यापिका वर्षा गोखले यांनी केले. पाहुण्यांचा सत्कार ज्येष्ठ शिक्षक असलम हुक्कीरे यांच्या हस्ते करण्यात आला. कार्यक्रमाचे सूत्रसंचालन संजय पाटील यांनी तर आभार सुवर्णा बोळाज मानले.यावेळी प्रसाद सोनवणे, सुनील मोरे, सोमनाथ जंगम मान्यवरासह विद्यार्थिनी उपस्थित होते.
टिप्पणी पोस्ट करा